Зарина Диас Australian Open турниріне жолдамадан кейін жанкүйерлерімен қуанышын бөлісті
Қазақстандық теннисші Зарина Диас 2026 жылы Australian Open негізгі сеткасында ойнауға мүмкіндік беретін іріктеу турнирінде жеңіске жетіп, ерекше қуанышын әлеуметтік желіде бөлісті. Ол марапаттау рәсімінен бірнеше сурет жариялап, тарихи жеңісі жайлы әсерлі жазба қалдырды.
«Ең қиын күндерден кейін жарық туады» — Диас эмоциясымен бөлісті
Зарина өз жазбасында қиын кезеңдерден сүрінбей өтуінің маңызын атап өтті:
«Бұл сәт — ең ауыр күндерден кейін де жарықтың болатынының дәлелі. AO Wild Card Play-Off турниріндегі жеңісім ұзақ әрі менталды тұрғыдан күрделі жолды жеңіп өткенімді көрсетті. Мен тағдырыма ризамын және осының бәрінен өте алғаныма мақтанамын», — деп жазды спортшы.
Оның жетістігіне жанкүйерлермен бірге танымал теннисшілер Анастасия Павлюченкова мен Присцилла Хон да құттықтау пікір қалдырды.
Зарина Диастың іріктеудегі жетістігі
Бұған дейін Зарина Диас Қытайда өткен The Australian Open Asia-Pacific іріктеу турнирінің чемпионы атанған еді. Жеңімпаз ретінде ол Australian Open негізгі сеткасына арнайы wild card алды. Бұл — маусымдағы алғашқы «Үлкен дулыға» турнирі, дәстүрлі түрде Мельбурн қаласында хард кортта өтеді.
