Тоқаев Си Цзиньпинге көңіл айту телеграммасын жолдады
Қазақстан Президенті Қасым-Жомарт Тоқаев Гонконгтегі ірі өртке байланысты ҚХР Төрағасы Си Цзиньпинге көңіл айту телеграммасын жолдады, деп хабарлайды dailykz Ақордаға сілтеме жасап.
Ақордадан түскен мәліметке сәйкес, Қасым-Жомарт Тоқаев Си Цзиньпинге және бүкіл қытай халқына Гонконг қаласындағы ірі өрт салдарынан болған көптеген адам шығындары үшін көңіл айтқан.
Президент зардап шеккендерге тезірек сауығып кетуін тілеген.
Еске салсақ, кеше Гонконгтегі ірі көпқабатты кешендердің бірінде үлкен өрт шыққан еді. От ЖК аумағындағы сегіз кварталдан жетісін шарпыған, сондай-ақ сол аумақтағы саябақтар мен инфрақұрылымды да зақымдаған.
Бастапқыда 13 адамның қаза болғаны хабарланса, кейін құрбан болғандардың саны 44-ке жеткен. Тағы бірнеше ондаған адам ауыр халде ауруханаға жеткізілген, ал 270-тен астам адам із-түссіз жоғалған деп тіркелген.
Полиция өрт оқиғасына байланысты қылмыстық іс қозғап, әдейі емес адам өлтіру фактісі бойынша үш адамды ұстағанын хабарлады.
