Петр Ян UFC рейтингінде: титулдық жеңістен кейін үздіктер қатарына енді
Абсолютті файтинг чемпионаты (UFC) Лас-Вегаста өткен UFC 323 турнирінің қорытындысы бойынша ерлер мен әйелдер арасындағы жаңартылған рейтингтерді ресми сайтында жариялады, деп хабарлайды dailykz.
Турнирдің басты жекпе-жегінде ресейлік спортшы Петр Ян грузиялық Мераб Двалишвилиді жеңіп, жеңіл салмақта (61,2 кг-ға дейін) UFC-дің жаңа чемпионы атанды. Бұл нәтиже салмақ дәрежесіне қарамастан жасалатын ең үздік бойцовтар рейтингіне (P4P) тікелей әсер етті. Петр Ян аталған тізімге бірден еніп, алтыншы орынға көтерілді. Ал Двалишвили керісінше, үшінші орыннан сегізінші сатыға төмендеді.
Сондай-ақ P4P рейтингінде Джошуа Ван алғаш рет бой көрсетті. Мьянма өкілі ең жеңіл салмақта (56,7 кг-ға дейін) бразилиялық Александр Пантожаның жекпе-жектің алғашқы минутында алған жарақатына байланысты чемпиондық белбеуді иеленді. Нәтижесінде жаңа чемпион 11-орынға тұрақтады. Ал Пантожа бесінші позициядан тоғызыншы орынға сырғыды.
P4P рейтингінің көшін бұрынғыдай ресейлік Ислам Махачев бастап тұр. Ол қазіргі таңда жартылай орта салмақта (77,1 кг-ға дейін) чемпиондық титулға ие. Әйелдер арасындағы дәл осы рейтингте Қырғызстан өкілі Валентина Шевченко көш бастап келеді — ол ең жеңіл салмақтың чемпионы.
Қазақстандық бойцовтар өз орындарын сақтап қалды. Шавкат Рахмонов жартылай орта салмақта үшінші орында, ал Асу Алмабаев ең жеңіл салмақта жетінші сатыда тұр.
