“Оның беделі мінсіз”: World Boxing президенті ретіндегі Головкинді қандай қиындықтар күтіп тұр
Геннадий Головкиннің World Boxing ұйымының президенті қызметіне келуі халықаралық баспасөздің ерекше назарын аудартты. Британиялық CMBoxing басылымы да осы тақырыпқа арнайы материал арнап, қазақ боксшысын жаңа лауазымында маңызды әрі күрделі сынақтардың күтіп тұрғанын жазды, деп хабарлайды dailykz.
Басылымның айтуынша, Головкиннің сайлануы спорт әлемінде көтеріңкі көңіл күй тудырды. Медиада «Адалдық қайта оралды», «Жаңа таң атты», «Аңыз олимпиадалық қозғалысты құтқарады» деген оптимистік тақырыптар жарияланды.
Алайда авторлар шынайы жағдайды да атап өтеді:
«Головкиннің World Boxing басшысы болуы – барлық мәселенің шешімі емес. Бұл көп жылдар бойы күйреп келген жүйені жасыру үшін спорттың ең мықты есімін алға шығару амалына көбірек ұқсайды», – деп жазады CMBoxing.
Материалда Головкиннің есімі мінсіз әрі беделі таза екені айтылады. Бірақ оның еншісіне өткен салалық дағдарыстар бірден жоғалып кетпейтіні де ескертіледі.
GGG жаңа қызметінде қандай мәселелермен бетпе-бет келеді?
1. Кез келген басшыдан ұзақ өмір сүретін коррупция
Авторлардың пікірінше, IBA бір күнде күйреген жоқ – ол ондаған жыл бойы жиналған басқару дағдарысы, жанжалдар мен қаржылық ретсіздіктің салдарынан әлсіреді.
Головкин енді сол «көпжылдық қардың» астында қалған дүниежүзілік бокстағы мәселелермен күресуге мәжбүр болады.
2. Қаржыландырудың тұрақсыздығы
Мәліметке сүйенсек, қазіргі әлемдік бокс әлі жас құрылым, әрі қысым күшейіп тұр.
ХОК боксты Олимпиада бағдарламасына шартты түрде ғана енгізіп отыр, сондықтан қаржыландыру да тұрақты емес. Бұл – жаңа басшылыққа үлкен жауапкершілік жүктейтін фактор.
3. Елдердің әлі де бөлінулігі
Бірқатар мемлекеттер IBA-дан бас тартты, ал кейбірі сол құрамда қалды. Тағы бір бөлігі екі тарапқа да ойнап отыр.
«Головкинге бірлік қажет, бірақ ол Брекситтен кейінгі Еуропаның картасына ұқсайтын саяси ахуалды мұраға алды», – делінген мақаласында.
Головкиннің сайлануы және алғашқы қадамдары
23 қарашада Римде өткен World Boxing Конгресінде Геннадий Головкин ресми түрде ұйым президенті ретінде бекітілді.
Ресми бекітуден кейін ол делегаттарға алғашқы сөзін сөйлеп, кейін бұл тарихи сәт туралы әлеуметтік желілерде пікір білдірді.
Осыдан соң Қазақстан президенті Қасым-Жомарт Тоқаев Геннадий Головкинді I дәрежелі «Барыс» орденімен марапаттады.
