«Олимпиакос» – «Қайрат» матчы қарсаңында: грек клубы Астанадан жолдау жасады
Грекиялық «Олимпиакос» футбол клубы Алматының «Қайратымен» өтетін Чемпиондар лигасындағы матч қарсаңында Астанаға келді. Кездесу алдында клубтың баспасөз қызметі Қазақстан астанасынан кадрлар жариялады, деп хабарлайды dailykz.
«Олимпиакостың» Instagram желісіндегі ресми парақшасында Есіл өзенінің қар басқан жағалауында клуб шарфын ұстаған адам бейнеленген сурет пайда болды. Жазба астына:
«Астанадан қайырлы таң!» – деп қысқа да нұсқа хабар қалдырылған.
Сонымен қатар, грек клубы ойыншылардың Астанаға ұшып келген сәтінен видео да жариялады.
«Қазақстанға қону», – деп сипаттады кадрларды клубтың баспасөз қызметі.
Видеода футболшылардың ұшақтан түсіп, елорда аумағына келгенін көруге болады. Бұған дейін «Олимпиакос» ойыншылары «Қайратқа» қарсы матч алдында Астанадағы аязды ауа райына қатысты пікір білдірген еді.
Айта кетейік, қазақстандық «Қайрат» УЕФА Чемпиондар лигасының жалпы кезеңіндегі соңғы екі үйдегі ойынын Астанада өткізеді. 9 желтоқсанда алматылық клуб грек «Олимпиакосын» (Пирей) қабылдайды, ал 20 қаңтарға Бельгияның «Брюгге» командасымен матч жоспарланған.
