Олимпиада жүлдегері Дәулет Шабанбай әскери қызметкерлерге шабуыл жасады деп сотталып жатыр
Павлодар қаласында белгілі спортшы, еркін күрестен Олимпиаданың қола жүлдегері Дәулет Шабанбайға қатысты сот процесі өтіп жатыр. Ол әскери қызметкерлерге күш қолданды деген айыппен жауапқа тартылды. Бұл туралы dailykz «Ирбис TV» арнасына сілтеме жасап хабарлайды.
Қылмыстық іс Павлодар қаласының қылмыстық істер жөніндегі мамандандырылған сотында қаралуда. Айыпталушылар орнында 42 жастағы Дәулет Шабанбай отыр. Тергеу органдары оған «Билік өкіліне қатысты қорқыту немесе күш қолдану» бабы бойынша айып таққан.
Тергеу деректеріне сәйкес, оқиға 2025 жылғы 18 қыркүйекте болған. Кешкі уақытта Дәулет Шабанбай Сурағанов көшесіндегі дәмханада болып, спирттік ішімдік ішкен. Шамамен 20:30-да ол мекемеден шығып, автовокзал жаққа қарай жүрген. Біраз уақыттан кейін қайтадан сол дәмханаға оралмақ болған.
Сотта жарияланған айыптау нұсқасына сай, сол күні шамамен сағат 21:00-де мас күйде жүрген Шабанбайды Ұлттық ұланның №5512 әскери бөлімінің мерзімді қызметтегі сарбаздары – Алиев, Мергембаев және Лес тоқтатқан. Олар қоғамдық тәртіпті сақтау бойынша қызметтік маршрутта жүрген және автовокзал маңында ірі денелі, мас күйдегі белгісіз ер адамның өзін оғаш ұстап жүргені туралы азаматтан хабарлама түскен.
Әскери қызметкер Алиев Шабанбайдан құжаттарын көрсетуді сұрап, қайда бағыт алғанын анықтауға тырысқан. Алайда, тергеу мәліметінше, Олимпиада жүлдегері талапқа бағынбай, сарбаздарды балағаттаған. Алиев оны тыныштандырмақ болғанда, Шабанбай оның иығына аяғымен соққы жасаған. Кейін Мергембаевтың да бетіне жұдырықпен ұрғаны, ал Алиевтің тағы да бет тұсынан соққы алғаны айтылды.
Айыптау актісінде көрсетілгендей, оқиға орнына қосымша әскери жасақтар келіп, Шабанбайға «самбо» жауынгерлік тәсілін қолданып, жерге құлатқан. Одан кейін қолына кісен салынып, полиция қызметкерлері келгенше ұсталған.
Алдағы сот отырыстарында куәлардың, жәбірленуші әскери қызметкерлердің және айыпталушының өз жауабы тыңдалады. Аталған баптың санкциясы 3 жылдан 7 жылға дейін бас бостандығын шектеуді немесе бас бостандығынан айыруды көздейді.
Еске сала кетейік, Дәулет Шабанбай 2012 жылғы Лондон Олимпиадасында еркін күрестен қола жүлде жеңіп алған. Алайда марапат спортшыға ресми түрде тек 2022 жылдың қыркүйегінде, араға 10 жыл салып табысталған еді.
