«Мәскеуде тұрады»: Қазақстанда Елена Рыбакинаның Ресей азаматтығы туралы ақпарат жоққа шығарылды
Ресей теннис федерациясының президенті Шамиль Тарпищев қазақстандық теннисші Елена Рыбакинаның Мәскеуде тұратынын және оның Ресей азаматтығы бар екенін мәлімдеді. Алайда бұл ақпаратты Қазақстан теннис федерациясы (ҚТФ) толықтай теріске шығарды.
Тарпищев «Матч ТВ»-ға берген сұхбатында Рыбакина Қазақстан атынан тек спорттық мансабы үшін ғана өнер көрсетеді деген пікір айтты. Оның сөзінше, теннисші Ресейде тұрады және ресейлік азаматтығы бар, ал Қазақстан атынан өкілдік етуі — спорттық шешім.
Қазақстан теннис федерациясының жауабы
Sports.kz мәліметінше, Қазақстан теннис федерациясы бұл пікірлердің шындыққа жанаспайтынын атап өтті. Федерация өкілдері Қазақстанда қос азаматтыққа рұқсат жоқ екенін және «спорттық азаматтық» деген ұғым мүлде қолданылмайтынын еске салды.
«Елена Рыбакина Мәскеуде тұрмайды. Ол — Қазақстан Республикасының азаматы, қазақстандық төлқұжаты бар және елорда Астанада тіркеуде. Мұны Елена өзі де бірнеше рет ашық айтқан», — делінген федерация мәлімдемесінде.
Сондай-ақ ҚТФ өкілдері теннисшінің «ресейлік азаматтығы» немесе «спорттық азаматтығы» бар деген тұжырымдардың фактілерге сәйкес келмейтінін нақтылады. Қазақстан заңнамасында мұндай мәртебе қарастырылмаған.
Ресми мәртебе және халықаралық жарыстар
Федерацияның хабарлауынша, Елена Рыбакина 2018 жылдан бері барлық халықаралық турнирлерде Қазақстан атынан ресми түрде өнер көрсетіп келеді және ұлттық құраманың мүшесі болып табылады.
