Геннадий Головкинге қатысты маңызды шешім: Бокстың халықаралық Даңқ залы жаңа мүшелерін жариялауға дайындалып жатыр
Бокстың халықаралық Даңқ залы биылғы жаңа мүшелерінің есімдерін 4 желтоқсан, бейсенбі күні жариялайды. Еске салайық, кандидаттар тізіміне қазақстандық Геннадий Головкин де енгізілген, деп хабарлайды dailykz.
Ұйымның мәліметінше, жеңімпаздар қазіргі заманғы боксшылар арасынан — ерлер және әйелдер дивизиондары бойынша, сондай-ақ ардагерлер мен ресми бақылаушылар санаттары бойынша анықталады.
Дауыс беруге Америка Бокс журналистері ассоциациясының мүшелері және әлемнің әр елінен жиналған бокс тарихшыларының халықаралық тобы қатысқан. Сайысқа Жапония, Англия, Канада, Аргентина, Австралия, Нидерланд, Германия, Мексика және АҚШ өкілдері дауыс берді.
Даңқ залының атқарушы директоры Эдвард Брофидің айтуынша:
“Әр жыл сайын жаңа мүшелерді жариялау — бокс қауымдастығы үшін толқу мен үлкен үмітке толы сәт. Біз жаңа мүшелерді қарсы алып, боксты ұлы спорт ретінде лайықты дәрежеде атап өтуді асыға күтеміз”, — деді ол.
Жаңа мүшелерге Нью-Йорк штатының Канастота округінде өтетін ресми рәсім барысында Даңқ залының алтын сақинасы табысталады.
Айта кетейік, 2 қазанда Бокстың халықаралық Даңқ залы (IBHOF) 2026 жылғы енгізілетін мүшелер тізімін жариялаған болатын. Тізімде Геннадий Головкиннің есімі де бар.
Сонымен қатар, 23 қараша күні Римде өткен World Boxing конгресінде Геннадий Головкин ұйымның президенті ретінде ресми түрде бекітілді.
