Футболдан 2026 жылғы әлем чемпионатының іріктеуі: Қазақстан — Бельгия матчы, тікелей көрсетілім және турнирлік жағдай
15 қараша, сенбі күні Қазақстан ұлттық футбол құрамасы 2026 жылғы әлем чемпионатына іріктеу кезеңіндегі сегізінші ойынын өткізеді. Dailykz осы маңызды кездесу алдындағы негізгі сұрақтарға жауап береді.
Матч қашан басталады?
J тобының ойыны “Астана Арена” стадионында өтеді. Кездесу жергілікті уақытпен 19:00-де басталады. Бұл — Қазақстан құрамасы үшін қазіргі іріктеу цикліндегі соңғы ойын.
Матчты қайдан көруге болады?
Ойынның ресми тікелей трансляциясын республикалық “Qazsport” телеарнасы көрсетеді. Матч аяқталғаннан кейін арнаның YouTube-каналында ең қызықты сәттердің шолуы жарияланады.
Қазақстан қандай орында тұр?
ФИФА-ның ерлер құрамалары рейтингінде Қазақстан 115-орында. Ал Бельгия ұлттық құрамасы әлемде сегізінші орында тұр. Топтық жағдайға келсек, командалар әртүрлі мөлшерде ойын өткізген.
Қазақстан құрамасы іріктеуді Уэльспен сырт алаңдағы 1:3 есебімен аяқталған матчтан бастады. Кейін Лихтенштейнді сырт алаңда 2:0 жеңді, алайда өз алаңында Солтүстік Македонияға (0:1) және Уэльске (0:1) есе жіберді. Бұдан кейін команда Бельгиядан 0:6 есебімен ауыр жеңіліске ұшырады. Осы ойыннан кейін бас бапкер Али Алиев қызметінен кетті.
10 қазанда жаңа жаттықтырушы Талғат Байсуфиновтың жетекшілігімен Қазақстан Лихтенштейнді өз алаңында 4:0 есебімен ойсырата жеңді, ал сырт алаңда македондармен 1:1 тең түсті.
Қазір ұлттық құраманың активінде 7 ұпай бар және ол төртінші орында. Қазақстан құрамасының ЧМ-2026-ға шығу мүмкіндігі математикалық тұрғыда жойылғанымен, теориялық түрде үшінші орынға көтерілу мүмкіндігі бар.
Бельгия алты ойынның бірде-бірінде жеңілмеген. Олар Солтүстік Македониямен екі рет тең ойнады (1:1 — сырт алаңда, 0:0 — үйде), Уэльсті екі рет ұтты (4:3 — үйде, 4:2 — сыртта). Сонымен қатар Қазақстанды (6:0) және Лихтенштейнді (6:0) ірі есеппен жеңді.
Бельгия құрамасы 14 ұпаймен J тобында көш бастап тұр. Одан кейін 13 ұпайы бар Солтүстік Македония келеді, олар бір ойын артық өткізген.
Әлем чемпионатына кімдер жолдама алады?
Барлық 12 топтың жеңімпаздары ЧМ-2026 турниріне тікелей жолдама алады. Екінші орын алған командалар плей-офф кезеңіне қатысып, УЕФА аймағынан қосымша төрт жолдаманы сарапқа салады.
Қазақстан құрамасының құрамы қандай?
Бельгияға қарсы ойынға арналған нақты футболшылар тізімін УЕФА-ның ресми сайтынан көруге болады. Старттық құрамдар матч басталғанға шамамен бір сағат қалғанда жарияланады. Ойын барысында екі команда да бес-бес ойыншыны алмастыруға құқылы.
Қазақстан құрамасын кім жаттықтырады?
Қыркүйек айының соңында бас бапкер міндетін атқарушы ретінде 57 жастағы қазақстандық маман Талғат Байсуфинов тағайындалды. Ал отставкаға кеткен Алиев штабта ассистент қызметін жалғастырып жатыр. Бельгия құрамасының бас бапкері — 61 жастағы француз маманы Руди Гарсия.
Қазақстан — Бельгия матчы ЧМ-2026 іріктеуіндегі шешуші ойындардың бірі болып қала береді.
