“Барселона” аңызы Андрес Иньеста алаяқтыққа қатысы бар деп күдікке ілінді
Перу прокуратурасы әйгілі футболшы Андрес Иньестаны қаржылық алаяқтыққа қатысы бар деп тергеп жатыр, деп хабарлайды dailykz РИА Спортқа сілтеме жасап.
Тергеп-тексеру басталды
Ақпаратқа сәйкес, “Барселонаның” бұрынғы капитаны Андрес Иньеста өзінің Never Say Never атты компаниясы және оның еншілес ұйымы арқылы қаржылық алаяқтық желісіне қатысы бар деген күдікке ілінген. Бұл туралы испандық El Espanol басылымы хабарлаған.
600 мың долларлық шығын
Перулық кәсіпкерлер компания әрекетінің кесірінен 600 мың АҚШ долларынан астам қаржы жоғалтқан. Осы себепті бұрынғы футболшыға қатысты ресми тергеу ісі қозғалды.
Прокуратураның мәліметінше, компания спорттық және музыкалық іс-шаралар ұйымдастыру үшін қаражат жинаған. Алайда жоспарланған жобалардың көбі өткізілмей, жиналған ақша иелеріне қайтарылмаған.
Болуы тиіс матч та өтпей қалды
Соның ішінде Перу мен Испанияның футбол аңыздары арасында өтеді деп жоспарланған матч та жүзеге аспаған.
Иньестаның рөлі
Андрес Иньеста ұйымның Оңтүстік Америкадағы бөлімшесін ашу жарнамасына қатысқан. Бірақ басылымның хабарлауынша, өткен жылы Never Say Never компаниясының аймақтық филиалы банкрот деп жарияланып, жою процесі басталған.
Аңыз футболшының жетістіктері
“Чемпионат” порталының дерегінше, Андрес Иньеста – Еуропаның екі дүркін чемпионы және әлем чемпионы атанған. Ол ұзақ жылдар бойы “Барселона” клубының капитаны болды және футбол тарихындағы ең техникалық ойыншылардың бірі ретінде мойындалған.
