«Ақшаңызды картта ұстай беріңіз»: алаяқтардың қазақстандықтарды алдаудың жаңа тәсілі
Қазақстандықтардың жинаған қаражатын қолды қылудың жаңа жолын тапқан алаяқтар енді адамдардан ақша аударуды емес, жай ғана карталарында белгілі бір соманы ұстап тұруды сұрайды, деп хабарлайды dailykz.
Алаяқтардың басты мақсаты – сенімге кіріп, адамды қобалжыту немесе «мүмкіндікті өткізіп аламын» деген сезім туғызу арқылы қаражатты иемдену. Жаңа схема қауіпті, себебі жәбірленушіден ешқайда ақша аудару талап етілмейді – керісінше, қарапайым дебеттік картасына ақша салу ғана сұралады.
Алматылық Жәния (аты өзгертілген) осы тәсілдің құрбаны болғанын айтып берді.
1-қадам: Жәбірленушіні қызықтыру
Жәнияның айтуынша, қазан айында ол интернеттен «Қазатомөнеркәсіп» атынан тараған инвестициялық платформа туралы жарнама көрген. Онда «инвестициядан табыс табу үшін» сайтқа тіркеліп, күн сайын анкета белгілерін басып, «сатылымдар жасау» жеткілікті деп көрсетілген.
Тіркелу үшін ақша енгізу қажет болған. Осылайша Жәния 150 мың теңге аударған. Ол «бір ай жұмыс істегеннен» кейін, таңертең оған банк қызметкеріміз деп таныстырған адам хабарласып, оның шотында 6 мың доллар (3,126 млн теңге) табыс жиналғанын айтқан.
Алайда бұл соманы алу үшін 20% комиссия (1,25 млн теңге) «жабу» керек екені айтылыпты.
«Маған ешкімге ақша жіберудің қажеті жоқ деді. “Жай ғана картаңызда түске дейін 300 мың теңге ұстап тұрыңыз, әйтпесе табысыңыз жойылады”, – деді өзін менеджермін деген адам. Кейін ақша сіздің шотыңызға түседі, комиссияны кейін өзіңіз компанияға аударасыз деп сендірді», – дейді Жәния.
Қалай алданады?
Мұндай жағдайда адам толық қауіпсіздіктемін деп ойлайды: оған ешкімге ақша аудармауды, тек картасын толтыруды айтады. Бірақ алаяқтардың мақсаты – дәл осы.
Жәбірленуші «компания сайтына тіркелгенде» өзінің карта нөмірін, CVV-кодын және басқа деректерін фишингтік сайтқа енгізеді. Алаяқтар осы деректерді пайдаланып, картасы толған сәтте ішіндегі ақшаны бірден шешіп алады.
Соңында ақша картадан жоғалады, ал адам өзінің жинаған қаражатынан айырылады.
Қазақстандықтарды алдап жатқан бұл жаңа әдіс қарапайым көрінгенімен, өте қауіпті — картаны толтырудың өзі алаяқтардың банк деректерін пайдаланып, қаражатты бір сәтте шешіп алуына мүмкіндік береді.
