Ақмола облысында мемлекет қаржысына салынған екінші спорт нысаны ашылды
Көкшетауда Kokshe Arena спорт кешенінің ашылуы мемлекеттік деңгейдегі күрделі жұмыстың нақты әрі көзге көрінетін нәтижеге қалай айналатынын көрсетті. Бұл спорт кешені Ақмола облысында арнайы мемлекеттік қордың қаражаты есебінен салынған екінші нысан болды. Аталған қор мемлекетке қайтарылған активтерден қалыптастырылған, деп хабарлайды Ақмола облысы әкімдігінің ішкі саясат басқармасы.
Жуыр уақытқа дейін активтерді мемлекетке қайтару тақырыбы көпшілік үшін тек жаңалықтар мен ресми мәлімдемелер аясында ғана айтылып келді. Ал бұл жолы оның нақты нәтижесі айқын көрінді: қайтарылған қаржы күнделікті пайдаланылатын спорт кешенінің құрылысына бағытталды. Мұнда енді тұрақты жаттығулар, жарыстар, балалар секциялары және жергілікті спортшыларды даярлау жұмыстары жүргізіледі.
Мемлекеттік саясат пен спортты дамыту
Ақмола облысының әкімі Марат Ахметжановтың айтуынша, Мемлекет басшысы Қасым-Жомарт Тоқаев өз сөздерінде бұқаралық спортсыз дені сау ұрпақ тәрбиелеу мүмкін еместігін бірнеше рет атап өткен.
«Сондықтан спортты дамыту, жастарды қолдау және салауатты өмір салтын қалыптастыру – басты басымдықтардың бірі. Kokshe Arena – кәсіби спорт пен бұқаралық дене шынықтыруды тоғыстыратын жаңа мүмкіндіктер кеңістігі. Кешен барлық заманауи талаптарға сай салынып, халықаралық стандарттарға толық жауап береді», – деді өңір басшысы.
Қысқа мерзімде жүзеге асқан жоба
Жоба өте қысқа мерзімде іске асырылды. 2024 жылдың қазан айында алғашқы капсула салынған сәттен бастап, нысанның ашылуына дейін бір жылдан сәл ғана астам уақыт өтті. Мұндай ауқымды спорттық жоба үшін бұл тапсырыс беруші, жобалаушылар мен мердігерлер арасындағы нақты үйлесімді жұмысты талап етті.
Kokshe Arena бастапқыда көпфункционалды спорт кешені ретінде жобаланды. Яғни, ол белгілі бір спорт түрімен немесе шара форматына ғана байланбайды.
Негізгі мүмкіндіктері
Кешеннің басты ерекшелігі – 650 көрерменге арналған негізгі зал. Бұл алаңда республикалық және халықаралық деңгейдегі жарыстарды өткізуге толық мүмкіндік бар. Сонымен қатар инфрақұрылымның басым бөлігі күнделікті жұмысқа – жаттығуларға, спорт секцияларына және оқу-жаттығу жиындарына бағытталған.
