Қазақстанның жастар хоккей құрамасы әлем чемпионатындағы алғашқы жеңісіне қол жеткізді
Қазақстанның жастар хоккей құрамасы (20 жасқа дейін) 2025 жылғы әлем чемпионатының IA дивизионында алғашқы жеңісін тіркеді, деп хабарлайды dailykz тілшісі.
Әлем чемпионатының екінші деңгейлі дивизионындағы матчтар Словенияның Блед қаласында өтіп жатыр. Екінші турда қазақстандық хоккейшілер турнир қожайындары — Словения құрамасымен кездесіп, буллиттер сериясында 5:4 есебімен жеңіске жетті.
Негізгі уақытта Қазақстан құрамасы сапында Абзал Әлібек дубль авторы атанды (21 және 53-минуттар). Сондай-ақ Асанали Сәркенов (46-минут, басымдық кезінде) пен Әлішер Сәркенов (54) мергендік танытты.
Словения құрамасында Племелж Хробат (4), Лепса Петронижевич (9), Жан Шпари Лебен (34) және Ян Голичич (51) шайба соқты.
Буллиттер сериясында Әлібек, Сәркенов және Семен Черкасов өз мүмкіндіктерін сәтті пайдаланып, Қазақстан құрамасына екі ұпай алып келді.
Осылайша, Антон Васин шәкірттері екі ойыннан кейін үш ұпай жинады. Қазақстан құрамасы Украинадан өзара кездесудегі жеңілісіне байланысты турнир кестесінде төртінші орында тұр.
Қазір турнирде Австрия алты ұпаймен көш бастап келеді, одан кейін Норвегия (5 ұпай). Словения бір ұпаймен бесінші орында, ал Франция құрамасы әзірге ұпайсыз соңғы сатыда орналасқан.
Айта кетейік, турнир жеңімпазы жоғары дивизионға жолдама алады, ал ең әлсіз команда үшінші деңгейлі лигаға төмендейді.
Өткен маусымда элиталық дивизионнан түсіп қалған Қазақстанның жастар хоккей құрамасы үшінші турда Францияға қарсы ойнайды. Бұл матч 10 желтоқсанға жоспарланған.
