Қазақстанның жастар хоккей құрамасы Украинадан жеңіліспен әлем чемпионатын бастады
Қазақстанның жастар хоккей құрамасы (U20) 2025 жылғы жастар арасындағы әлем чемпионатын Украинаға қарсы матчтан бастады. IA дивизионы аясындағы алғашқы ойында қазақстандықтар қарсыласына овертаймда 1:2 есебімен жол берді. Бұл туралы dailykz тілшісі хабарлайды.
Турнир екінші деңгейлі IA дивизионында өтіп жатыр. Жарыс матчтары Словенияның Блед қаласында ұйымдастырылған. Ашылу кездесуінде Қазақстан мен Украина құрамалары тартысты ойын көрсетті, алайда қосымша уақытта украиналықтар жеңісіне жетті.
Ойынның есеп-шотын 7-минутта Қазақстан құрамасының шабуылшысы Корней Корнеев ашты. Ол Карим Қажыбеков пен Мажит Имашевтың нәтижелі пастарынан кейін шайбаны торға тоғытты. Украина құрамасы екінші кезеңнің соңында сан басымдығын пайдаланып, Никита Куликовтың (42-минут) дәл соққысымен есепті теңестірді. Ал шешуші шайбаны овертаймда Даниил Кураев (63) соқты.
Алғашқы тур қорытындысы бойынша Украина құрамасы екі ұпаймен үшінші орынға тұрақтады. Үш ұпайдан жинаған Норвегия мен Австрия құрамалары тиісінше Франция мен Словенияны негізгі уақытта жеңіп, көш бастады.
Қазақстан құрамасы бір ұпаймен төртінші орында тұр. Екінші турда, 8 желтоқсанда, жастар құрамасы Словения командасымен кездеседі.
Айта кетейік, IA дивизионының жеңімпазы келесі маусымда элиталық деңгейге жолдама алады. Қазақстанның жастар құрамасы былтыр жоғары дивизионда өнер көрсеткенімен, соңғы орын алып, төменгі лигаға түсіп қалған еді.
