Қазақстандық Олимпиада жүлдегері Даулет Шабанбай бас бостандығынан айырылды
Павлодар қаласында танымал спортшы, еркін күрестен жазғы Олимпиада ойындарының қола жүлдегері Даулет Шабанбайға қатысты сот үкімі шықты. Ол Ұлттық ұланның әскери қызметшілеріне күш қолдану дерегі бойынша кінәлі деп танылды, деп хабарлайды Irbis TV.
Сотта спортшыға ҚР Қылмыстық кодексінің 380-бабы 4-бөлігі 1-тармағы («Билік өкіліне қатысты, екі немесе одан да көп адамға күш қолдану») бойынша айып тағылды.
Сот барысы және тараптардың уәжі
Сот отырысында Даулет Шабанбай судан өзіне жеңілдік жасауды сұрап, кінәсін толық мойындап, өкініш білдірді.
Қорғаушысы спортшының кәмелетке толмаған балалары барын, сондай-ақ қарт ата-анасын асырайтынын айтты. Бұған қоса, айыпталушының қоғамнан оқшауланған жағдайда жеткілікті уақыт өткізгенін атап өтті.
Ал мемлекеттік айыптаушы спортшыға 4 жыл мерзімге нақты бас бостандығынан айыру жазасын сұрады.
Сот шешімі
Істі жан-жақты қараған сот Даулет Шабанбайды кінәлі деп танып, 3 жылға бас бостандығынан айыру жазасын тағайындады. Үкімді Павлодар қаласының қылмыстық істер жөніндегі мамандандырылған сотының судьясы Айгүл Ахметова жариялады.
Судьяның айтуынша, бұл іс бойынша қоғамнан оқшауламай жазалау мүмкін емес, алайда ең төменгі мерзім белгіленген. Қазіргі таңда үкім заңды күшіне енген жоқ.
Істің мән-жайы
Еске сала кетейік, бұған дейін Павлодарда 42 жастағы Даулет Шабанбайдың сотқа тартылғаны хабарланған болатын. Тергеу нұсқасына сәйкес, оқиға 2025 жылдың 18 қыркүйегінде болған.
Кешкі уақытта спортшы кафеде спирттік ішімдік ішіп отырған. Сағат шамамен 20:30-да ол автовокзал бағытына қарай серуендеуге шығып, жарты сағаттан соң қайта оралған.
Жолда оны Ұлттық ұланның №5512 әскери бөлімінің үш мерзімді әскери қызметшісі тоқтатып, құжаттарын көрсетуді сұраған. Алайда тергеу деректеріне сәйкес, Олимпиада жүлдегері талапты орындамай, керісінше әскери қызметшілерді балағаттаған.
