Қазақстандық мәнерлеп сырғанаушы Михаил Шайдоров Гран-при Финалына жолдама алды

Қазақстандық мәнерлеп сырғанаушы Михаил Шайдоров 2025/26 маусымындағы Халықаралық конькишілер одағы (ISU) Гран-при Финалына ресми түрде квалификациядан өтті. Бұл туралы ақпарат соңғы, алтыншы кезеңнің аяқталуынан кейін белгілі болды, деп хабарлайды dailykz.

Хельсинкиде өткен турнирде ерлер арасында жеңіске жапон спортшысы Юма Кагияма жетті (270,45 ұпай). Екінші орынды француз Адам Сяо Хим Фа (256,98), ал үшінші орынды канадалық Стивен Гоголев (253,61) иеленді.

Гран-при жүйесіне сәйкес, әлемнің үздік спортшылары маусым бойы өткізілген алты кезеңнің екеуінде өнер көрсетіп, рейтинг бойынша ұпай жинады. Тек ең жоғары нәтиже көрсеткен алты спортшы маусымның басты финалына жолдама алады. Сол үздік алтылықтың қатарына Қазақстан намысын қорғаған Михаил Шайдоров да енді. Ол АҚШ-та өткен кезеңде күміс, ал Қытайдағы жарыста қола медальға қол жеткізген болатын.

Ерлер арасындағы топ-6 рейтинг тізімі:

1. Илья Малинин (АҚШ) — 30 ұпай
2. Юма Кагияма (Жапония) — 30
3. Сюн Сато (Жапония) — 28
4. Адам Сяо Хим Фа (Франция) — 26
5. Михаил Шайдоров (Қазақстан) — 24
6. Даниэль Грассль (Италия) — 20

Бұл — Шайдоровтың Гран-при Финалына тікелей жолдама алған алғашқы маусымы. Өткен жылы ол алғашқы қосалқы спортшы ретінде ғана тізімге еніп, Сяо Хим Фа жарыстан шыққаннан кейін ғана финалда өнер көрсету мүмкіндігіне ие болған еді. Сол бәсекеде қазақстандық мәнерлеп сырғанаушы 5-орын алған.

Алдағы ISU Гран-при Финалы 5–8 желтоқсан аралығында Жапонияның Нагоя қаласында өтеді.