«Қайрат» Лига чемпиондарындағы өз алаңындағы матчтарды Астанаға көшіретінін ресми жариялады
Қазақстандық «Қайрат» клубы УЕФА Чемпиондар лигасының жалпы кезеңіндегі соңғы екі өз алаңындағы кездесуін Астанада өткізетін болды. Бұл жөнінде ақпаратты клубтың баспасөз қызметіне сілтеме жасап хабарлайды NUR.KZ.
Командаға жалпы кезең аясында екі үй матчы қалды:
- 9 желтоқсанда пирейлік «Олимпиакоспен» ойын өтеді,
- 20 қаңтарда бельгиялық «Брюгге» командасымен кездесу жоспарланған.
«Қайрат» УЕФА-мен бірлесіп, аталған матчтарды жабылатын шатыры бар “Астана Арена” стадионына көшіру туралы шешім қабылдады. Айта кетейік, елорда аренасында жасанды көгал төселген, ал Алматыдағы стадионда табиғи шөп қолданылады.
Алматылық клубтың мәлімдеуінше, Алматыдағы Орталық стадионда қыс мезгілінде ойын өткізу тәжірибесі ауа температурасының төмендігі, шатырдың болмауы және қар жауу қаупі жанкүйерлер үшін қолайсыз жағдай туғызатынын көрсеткен. Бұл факторлар алаңды күтіп ұстауды да қиындатады.
«Көрермендердің жайлылығы мен қауіпсіздігін қамтамасыз ету мақсатында ойындарды жабық стадионда өткізу жөн деп шештік», — деп түсіндірді клуб өкілдері.
Билеттердің бағасы мен сату тәртібі
«Қайраттың» мәліметінше, билеттердің құны 15 мыңнан 50 мың теңгеге дейін болады. Сауда 28 қарашада клубтың мобильді қосымшасында басталады. Бір адамға екі билеттен артық сатып алуға рұқсат берілмейді. Сондай-ақ клуб абонемент иелеріне билеттерді басымдықпен сатып алу ережесі туралы қосымша ақпарат береді.
«Қайраттың» қазіргі жағдайы
Жалпы кезеңнің төрт турынан кейін алматылықтар бір ұпай жинап, (Кипрдің «Пафосымен» тең ойын арқасында) турнир кестесінде 34-орында тұр. Команда тек бірде-бір ұпайы жоқ португалиялық «Бенфика» мен нидерландтық «Аякс» клубтарын ғана артта қалдырған.
